Спецыялізаваная выстаўка і канферэнцыя "Атамэкспа-Беларусь-2009" прайшла 10-13 сакавіка ў Мінску ў павільёне Нацыянальнага выставачнага цэнтра "Белэкспа".

Асноўнымі мэтамі выстаўкі былі прэзентацыя найноўшых тэхналогій праектавання, будаўніцтва, эксплуатацыі і забеспячэння бяспекі АЭС, прыцягненне інвестараў для фінансавання будаўніцтва атамнай станцыі. Работа форуму садзейнічала фарміраванню грамадскай думкі ў падтрымку стварэння ў Беларусі ўласнай АЭС, правядзенню ў рэспубліцы навукова-даследчых работ у галіне атамнай энергетыкі, развіццю сістэмы падрыхтоўкі кадраў для гэтай сферы.

На выстаўцы прадстаўлена прадукцыя атамнага машынабудавання, прыборы і абсталяванне для будаўніцтва і эксплуатацыі АЭС, сучасныя сістэмы ядзернай, эксплуатацыйнай і радыяцыйнай бяспекі. Наведвальнікі азнаёміліся з абсталяваннем і тэхналогіямі перапрацоўкі, транспарціроўкі і захоўвання радыеактыўных адходаў.

На канферэнцыі эксперты ўдзялілі ўвагу пытанням падрыхтоўкі кадраў для атамнай энергетыкі, ахове навакольнага асяроддзя і стратэгічным пытанням дзяржаўнай палітыкі па развіццю атамнай энергетыкі і забеспячэнню энергетычнай бяспекі краіны.

У выстаўцы і канферэнцыі прынялі ўдзел больш як 60 прадпрыемстваў і арганізацый з 6 краін свету, у тым ліку больш за 30 прадпрыемстваў атамнай галіны Расіі. Сярод удзельнікаў - Кітайская Гуандунская ядзерна-энергетычная карпарацыя, прадпрыемствы ДВА "Белэнерга", НАН Беларусі, РУП "БелАЗ", ТДА "Белтавэкс", НВП "Радый" (Украіна), ПУП "АЭС-камплект", НВП "ЭнергаНафтаХім", УП "Атамтэх" і іншыя.

У арганізацыі выстаўкі і канферэнцыі з беларускага боку ўдзельнічалі міністэрствы энергетыкі, адукацыі, інфармацыі, прыродных рэсурсаў і аховы навакольнага асяроддзя, архітэктуры і будаўніцтва, НАН Беларусі, Дэпартамент па атамнай энергетыцы Мінэнерга, МДЭУ імя А.Д.Сахарава, БНТУ. З расійскага боку арганізатарам выступіла ААТ "Атамэкспа" - афіцыйны выставачны аператар Дзяржаўнай карпарацыі па атамнай энергіі "Расатам" і арганізацый атамнай галіны Расіі.